قمر 14..في صيف 2009....

في البداية عايزين نتفق على شوية حاجات بسيطة...
1. إنك لازم تكوني جريئة في اختيارك للألوان في صيف 2009 وده لأن صيف 2009 بيتميز بظهور الألوان الجرئية بدرجاتها المختلفة زي "الأصفر الكناري" و"الأخضر الزرعي" و"التركواز" و"البيستاج" و"الموف" و"الأبيض" و"الأحمر" و"الفوشيا"، وعلى فكرة الألوان دي كلها بتليق على جميع ألوان البشرة سواء البيضاء أو الخمرية أو السمراء.
2. صيف 2009 بيتميز بوجود بلوزات بأقمشة مختلفة فهتلاقي بلوزات مصنوعة من القطن والكتان والليكرا والشيفون والستان، وكل نوع قماش ليه تصميمات خاصة بيه.
3. كل سن وليه موديلات محددة؛ فمثلا البنت اللي سنها أٌقل من عشرين بتلاقي إن البلوزات البسيطة جدا المصنوعة من القطن هي المناسبة ليها، وده لأن البنت في السن ده بتكون لسه في الكلية، والبلوزات اللي زي دي بتكون مريحة وعملية في نفس الوقت، لكن البنت اللي سنها أكتر من عشرين سنة فالمجال قدامها مفتوح إنها تختار أي تصميم أو أي نوع قماش هي عايزاه.
4. صور الموديلات الموجودة معانا النهارده ما هي إلا صور توضيحية تم الاستعانة بها للتوضيح، وعلى فكرة ممكن تستعيني بيها وتجيبي قماش وتشوفي خياطة شاطرة وتطلبي منها تصمم لك أي موديل من الموديلات اللي هتشوفيها معانا النهارده.
5. جميع الموديلات اللي هتشوفيها مناسبة للبنت المحجبة وغير المحجبة، وده لأن البنت المحجبة ممكن تلبسها وتلبس معاها بادي قطن أو معصم لليد، أما البنت غير المحجبة فممكن تلبس معاها توب أو تلبسها زي ما هي.
بلوزة لونها أصفر كناري بمجموعة من الزراير الأمامية، وبنلاقي إن الكتان أو القطن هما أنسب أنواع الأقمشة المناسبة للموديلات اللي زي الموجودة معانا في الصورة، وعلى فكرة خامة الكتان والقطن من الخامات المريحة جدا في الصيف لأنها بتمتص العرق...
الموديل ده بيناسب جميع المقاسات؛ يعني ممكن تختاره البنت اللي جسمها مليان؛ بس في الوقت ده تحاول تخلي طول البلوزة واصل لغاية منطقة الأراداف، أما البنت الرفيعة فممكن تصممه بأي طول هي عايزاه، ممكن تلبسي مع الموديل ده بنطلون أبيض زي ما هو موجود في الصورة، ولو حبيتي تغيري وتجددي من شكل الموديل ممكن تلبسي معاه بنطلون كحلي قماش أو جينز أو بنطلون أسود قماش.
الموديل التاني اللي معانا عبارة عن بلوزة شيفون مزخرفة بألوان متعددة زي الأصفر والأخضر، الموديل ده بيناسب البنت صاحبة القوام المتناسق يعني لا هي رفيعة، ولا هي مليانة، على فكرة ممكن تصممي تصميم زي ده بالضبط بس يكون قصير شوية وتلبسي معاه جوب شيفون مبطنة بالستان.
ده موديل تاني يشبه الموديل السابق لحد كبير؛ بس الفرق إن الموديل ده فيه شوية قصات من على الكم والصدر، علشان كده بنلاقي إن الموديل ده مناسب للبنت صاحبة القوام الممتلئ...
ودايما بننصح البنت صاحبة القوام الممتلئ بأنها تختار أقمشة فيها نقوش صغيرة، وتختار ألوان غامقة نوعا ما علشان ما تظهرش بحجم أكبر مما هي عليه.
ده تصميم تاني عبارة عن بلوزة كتان سادة؛ الموديل ده بيناسب البنت الرفيعة والبنت اللي قوامها متناسق، ممكن تعملي نفس الموديل ده وتعملي تطريز خفيف من على منطقة الصدر أو في نهاية الأكمام.
أما الموديل ده فهو عبارة عن بلوزة بنص كم مصممة من قماش الجرسيه المنقوش؛ الموديل ده بيناسب البنت صاحبة القوام المتناسق، ولأن الشكل ده منقوش فهتلاقي إن عندك حرية في اختيار أي لون بنطلون أنت عايزاه، بس خدي بالك إنه يكون مناسب للون النقوش الموجودة في البلوزة.

الموديل ده عبارة عن بلوزة سادة مقفولة من الأمام بكم واسع مقفول من عند منطقة الكوع، وده مناسب للبنت اللي ذراعها مليان لأنه هيداري امتلاء منطقة الذراع...كمان مناسب للبنت الرفيعة لأنه بيديها شكل حلو.
ده كمان تصميم من قماش الشيفون اللي فيه نقوش كتير ممكن البنت اللي جسمها رفيع تصمم زيه وتلبسه على جوب بيدي شكل في منتهى الشياكة.
ولأن الأقمشة الستان موضة في صيف 2009 فده تصميم ممكن تعملي زيه وتلبسيه، وعلى فكرة الموديل ده مناسب للبنت الرفيعة إنها تلبسه على بنطلون، لكن البنت اللي جسمها مليان يفضل إنها تلبسه على جوب.ده شكل تاني من أشكال البلوزات الستان، ممكن البنت اللي جسمها رفيع أو اللي جسمها متناسق تصمم زيه.

ده كمان موديل مناسب للبنت صاحبة القوام الممتلئ.
أما الشكل ده فبيناسب البنت الرفيعة أو البنت صاحبة القوام المثالي.
ده كمان شكل للبلوزة الشيفون اللي ممكن تتلبس على جوب.
ده كمان شكل من أشكال البلوزات الستان.
الموديل ده عبارة عن بلوزة من قماش الجرسيه منقوشة، وده بيناسب جميع المقاسات.

بجد شويه موديلات هايله

ميرسى كتير ومشكور على التواجد

موديلات جميلة اوى يا شموسة
بجد زوقك جميل

ميرسى ليكى دلوعه

تسلم ايديكى يا قمر ودى حاجه مش جديده عليكى دايما الاسبق فى التجديد والتميز